सुर्खेत । कालिकोटको नरहरिनाथ गाउँपालिका–९ लालुमा कर्णाली प्रदेशकै ठुलो सामुदायिक रानिरहडा खानेपानी आयोजना संचालनमा आएको छ । ‘एक घर एक खानेपानी धारा’ अन्र्तगत ३८२ घरमा खानेपानीको पहुँच पुगेको हो ।
हेल्भेटास नेपालको आर्थिक सहयोग र स्थानीय साझेदार संस्था हुरुण्डेक नेपालको प्राविधिक सहयोगमा २ करोड ५५ लाख १२ हजार ७ सय ९७ रूपैयाँ लागतमा खानेपानी आयोजना सम्पन्न भएको छ ।
जसमा हेल्भेटासको १ करोड, नरहरिनाथ गाउँपालिकाको १ करोड लगानि र बाँकी स्थानीयको श्रमदानमा खानेपानी आयोजना सम्पन्न भएको गाउँपालिका अध्यक्ष धिरबहादुर बिष्टले बताए । ‘३८२ घरधुरीमा खानेपानीको समस्या समधान भएको छ ।’ उनले भने, ‘पुस्तौंदेखि खानेपानीको समस्या भोग्दै आएका स्थानीयवासी समस्या समधान भएको छ ।’
डोको बोकेर १ घण्टाको पैदल यात्रा गरी खानेपानीको जोहो गर्नुपर्ने स्थानीयको बाध्यता पनि सदाका लागि अन्त्य भएको गाउँपालिका अध्यक्ष बिष्टले बताए । ‘तत्काल ३८२ धाराहरु सञ्चालनमा आइसकेको र बाँकी २५० घरधुरीमा धाराहरु जडान गर्न सर्वेक्षण भइरहेको छ ।’ उनले भने,‘बाँकी घरधुरीमा चाडै नै खानेपानीको पहुँच बिस्तार गरिनेछ ।’
कर्णाली प्रदेशकै सबैभन्दा ठुलो सामुदायिक खानेपानी आयोजना भएको साझेदार संस्था हुरुण्डेक नेपालका अध्यक्ष जजराज शाही बताए ।
खानेपानी आयोजना सञ्चालनमा आएसँगै नरहरिनाथ गाउँपालिका–९ का भाटगाउँ, गानेचौर, खाटेपडा, श्रीकोट र कोटबाडालगायतका बस्तीहरु प्रत्यक्ष लाभान्वित भएका छन् ।