सुर्खेत । प्रधानमन्त्री केपी शर्मा ओलीले संबिधान कुल्चिएर भष्मासुर हुने लाइनमा लागेको नेपाल कम्युनिष्ट पार्टी(नेकपा)का प्रचण्ड–नेपाल समूहका नेता तथा कर्णाली प्रदेश इन्चार्ज जर्नादन शर्माले बताएका छन् । सुर्खेतमा प्रेस संगठन नेपालले आयोजना गरेको पत्रकार सम्मेलनमा संबिधानमा नभएको धारा प्रयोग गरेर संसदको विघटन गरेर प्रधानमन्त्री ओली भष्मासुर हुने लाइनमा लागेको बताएका हुन् ।
आफुलाई पार्टीको फुटेको चिन्ताभन्दा राष्ट्रको चिन्ता रहेको नेता शर्माले बताए । ‘जनताले बनाएको संबिधानले काम गर्दैन् भने राष्ट्रको रक्षा कसरी रहन्छ । देश त संबिधान अनुसार नै चलाउने हो । त्यसैले कानुनको आवश्यकता भएको हो ।’ उनले भने,‘देशको संबिधानले काम गर्दैन । राष्ट्र प्रमुखले त्यसलाई मान्दैन भन्यो भने राष्ट्र, राष्ट्रियता, स्वाधिनता रहदैँन ।’
प्रधानमन्त्री ओलीको कदमले कसैले पनि सही नभनेका कारणले उनको कदम असंबैधानिक रहेको त्यसलाई असफल बनाएरै छाड्ने र संबिधानको रक्षा गर्ने नेता शर्माले बताए । ‘जनता, नागरिक, समाज, बुद्धिजीविहरु आफुहरुबाट रिसाएका छन् । त्यसका लागि क्षमा माग्दछौं ।’ उनले भने,‘संबिधानको रक्षा गर्न लागि निरकुशतन्त्रका बिरुद्ध जनता सडकमा आउने छन् । त्यसको समाप्त हुनेछ ।’
नेपालमा नयाँ बहसको थालनी गर्नुपर्ने बताउँदै नेता शर्माले संबिधान बनाउँदा जसको बलमा देशमा परिवर्तन भएको थियो त्यसलाई स्वामित्व नदिनु संबिधानमा नै गल्ती भएको महसुश भएको बताए । ‘नेपाल बहुजातीय, बहुभाषिक, बहुसास्कृतिक, बहुधार्मिक भएको देश हो । उनीहरुकै बलमा नयाँ संबिधान, गणतन्त्र, धर्मनिरपक्षेता, संघीय गणतन्त्र ल्याएका हौं ।’ उनले भने,‘त्यो वर्गको स्वामित्व संबिधानमा नहुँदा अहिले संबिधान कुल्चने काम भयो ।’
जसले गणतन्त्र, लोकतान्त्रिक, संघीय व्यवस्थाका लडेहरुले संबिधानका रक्षाका लागि स्वामित्व नलिएको र राजनीतिक दलहरुले त्यसको स्वामित्व लिएका कारणले अहिले संकट आएको नेता शर्माले बताए । ‘जसले नयाँ व्यवस्थाका लागि लडेका थिए । तिनको सहभागितासहित स्वामित्व संबिधानले दिन सकेन । समस्याको जड त्यहीनेर भयो ।’ उनले भने,‘निश्चित नेताको स्वामित्व संबिधानमा रह्यो । त्यो व्यवस्थाको अन्त्य गर्नका लागि बहसको थालनी गरिनुपर्छ ।’