सुर्खेत । सुर्खेतको वीरेन्द्रनगर–४ भैरवस्थानको भंगेरीचौरमा निर्माणधिन अवस्थामा रहेको सहिद पार्कमा आन्तरिक पर्यटकको आक्रर्षण बढ्दै गएको छ । कर्णाली प्रदेश प्राप्तिको लागि भएका सहिदको सम्झनामा निर्माण गर्न लागिएको सहिद पार्कमा आन्तरिक पर्यटकहरु पहिलो रोजाई हुने गरेको छ ।
कर्णाली प्रदेश सरकार अन्र्तगत वन तथा वातावरण निर्देशनालयले १ करोड १३ लाख ५१ हजार ६ सय १७ रुपैयाँ ९९ पैसामा पानीको फोहोरा, सहिद स्मारक, केहि क्षेत्रमा बगैँचा निर्माण गरिरहेको छ । पहिलो चरणको काम अभियान निर्माण सेवाले गरेको हो भने दोस्रो चरण अन्तर्गत न्यू बिसाल कन्ट्रक्सन प्रा.लिले भ्याटसहित ७७ लाखको लगानीमा ३ सय मिटर कम्पान्डिङको काम गरिरहेको छ ।
कम्पाउन्ड निर्माणको लागि अहिले बजेट अभावका कारण केहि ठाउँमा मात्रै निर्माणको काम भएको र बजेट उपलब्ध भएको अवस्थामा चालु आर्थीक बर्षमा पुरै कम्पाउन्डिङको काम सकिने वन तथा वातावरण निर्देशनालय कर्णाली प्रदेशका प्रमुख शिवराज अधिकारीले बताए । ‘भैरव सामुदायिक वनको ५ हेक्टर क्षेत्रमा सहिद पार्क निर्माणको काम भइरहेको छ ।’ उनले भने,‘तिन वर्षे गुरुयोजनामा ६ करोड बढी बजेट लाग्ने छ । हालसम्म झण्डै २ करोड बजेट निकासा भएको छ ।’
आफुहरु सुरुवाती चरणमा भएको र बजेट उपलब्ध भएको अवस्थामा समयमा नै निर्माण गर्न सकिने निर्देशक अधिकारीले बताए ।
वनस्पति उद्यान, पिक्निक स्पोर्ट, बाल उद्यान अझैँ निर्माण गर्न बाँकी रहेको भैरव सामुदायिक वनको अध्यक्ष अमर कार्कीले बताए । ‘निर्माणको काम अघि बढेसँगै आन्तरिक पर्यटकको घुईँचो दिन दिनै बढ्दै गएको छ,’ उनले भने, ‘यसले हामीलाई एक किसिमको हौसला दिएको छ । हामी दैनिक यसैको निर्माणमा खघिएका छौँ । जति सक्दो छिटो निर्माण हुनुपर्छ भन्नेमा हामी लागिरहेका छौँ ।’
अहिले निर्माणाधिन सहिद पार्कमा अहिले दैनिक तिन सयदेखि पाँच सयको हाराहारीमा मानिसहरु आउने गरेको कार्कीले जानकारी दिए ।